ក្រសួងកសិកម្ម រុក្ខាប្រមាញ់ និងនេសាទ

សេចក្តីសង្ខេប

ប្រវត្តិ និងបច្ចុប្បន្នភាពនៃអគ្គនាយកដ្ឋានកសិកម្ម

ដោយវិស័យកសិកម្មកម្ពុជាមានសន្ទុះរីកចំរើនយ៉ាងខ្លាំងនាទស្សវត្យរ៍ចុងក្រោយនេះហើយដោយមើលឃើញេពីទំហំការងារនិងភាពចាំបាច់ ដើម្បីធានាបាននូវសន្តិសុខស្បៀង ការគ្រប់គ្រងវិស័យកសិកម្ម និងប្រើប្រាស់ធនធានធម្មជាតិដោយចេរភាព ក្រសួងកសិកម្ម រុក្ខាប្រមាញ់ និងនេសាទ បានស្នើរាជរដ្ឋាភិបាលតម្លើងនាយកដ្ឋានក្សេត្រសាស្ត្រ និងកែលំអដីកសិកម្ម ទៅជាអគ្គនាយកដ្ឋានកសិកម្ម។

អនុក្រឹត្យលេខ១៨៨ អនក្រ.បក ចុះថ្ងៃទី១៤ ខែវិច្ឆិកា ឆ្នាំ២០០៨ បានធ្វើការកែសម្រួលរចនាសម្ព័ន្ធ គ្រប់គ្រងរដ្ឋបាល និង បច្ចេកទេសរបស់ក្រសួងកសិកម្ម រុក្ខាប្រមាញ់ និងនេសាទ ដើម្បីឱ្យឆ្លើយតបតាមតម្រូវការ ការងារជំរុញអភិវឌ្ឍន៍វិស័យកសិកម្ម រុក្ខាប្រមាញ់ និង នេសាទជាពិសេស ជំរុញការអនុវត្តគោលនយោបាយ យុទ្ធសាស្ត្រ របស់រាជរដ្ឋាភិបាលកម្ពុជា ឱ្យទទួលបានលទ្ធផល ត្រចះត្រចង់ថែមទៀត។ អនុក្រឹត្យនេះបានកែសម្រួលរចនាសម្ព័ន្ធអង្គការលេខមួយចំនួនរបស់ក្រសួងកសិកម្ម រុក្ខាប្រមាញ់ និងនេសាទ រួមមាន៖

អគ្គនាយកដ្ឋាននៃក្រសួង ទៅជាអគ្គលេខាធិការដ្ឋាននៃក្រសួង
រដ្ឋបាលព្រៃឈើ និងជលផល ដំឡើងថ្នាក់ស្មើ អគ្គនាយកដ្ឋាន
នាយកដ្ឋានក្សេត្រសាស្ត្រ និងកែលំអដីកសិកម្ម ដំឡើងទៅជា អគ្គនាយកដ្ឋានកសិកម្ម
ដូរឈ្មោះអគ្គនាយកដ្ឋានចម្ការកៅស៊ូ ទៅជា អគ្គនាយកដ្ឋានកៅស៊ូ។

អគ្គនាយកដ្ឋានកសិកម្មមាននាយកដ្ឋានចំនួន៨ មន្ទីរពិសោធន៍ជាតិកសិកម្មចំនួន១ និងកសិដ្ឋានស្ថានីយពិសោធន៍ស្រាវជ្រាវ និងមជ្ឈមណ្ឌលអភិវឌ្ឍន៍កសិកម្មសរុបចំនួន១៥ជាសេនាធិការ ហើយដែលនាយកដ្ឋានទាំង៩ នោះ រួមមាន៖

នាយកដ្ឋានផែនការ រដ្ឋបាល គណនេយ្យ និងសហប្រតិបត្តិការអន្តរជាតិ
នាយកដ្ឋានដំណាំស្រូវ
នាយកដ្ឋានសាកវប្បកម្មនិងដំណាំរួមផ្សំ
នាយកដ្ឋានដំណាំឧស្សាហកម្ម
នាយកដ្ឋានការពារដំណាំ អនាម័យ និងភូតគាមអនាម័យ
នាយកដ្ឋានគ្រប់គ្រងធនធានដីកសិកម្ម
នាយកដ្ឋានវិស្វកម្មកសិកម្ម
នាយកដ្ឋានអភិវឌ្ឍន៍សហគមន៍កសិកម្ម
នាយកដ្ឋានពូជដំណាំ។

បេសកកម្ម

អគ្គនាយកដ្ឋានកសិកម្ម មានបេសកកម្មដូចខាងក្រោម៖

លើកកម្ពស់ផលិតកម្មកសិកម្ម ដើម្បីចូលរួមចំណែកធានាសន្តិសុខនិងសុវត្ថិភាពស្បៀង
ផ្តល់សេវាកម្ម បច្ចេកទេសកសិកម្ម និងត្រួតពិនិត្យគុណភាពនិងសុវត្ថិភាពកសិផល
ជំរុញកំណើនផលិតភាពកសិកម្ម ពិពិធកម្ម និងកសិពាណិជ្ជូបនីយកម្ម។

តួនាទី ភារកិច្ច

អគ្គនាយកដ្ឋានកសិកម្ម មានភារកិច្ច ធ្វើជាសេនាធិការឱ្យក្រសួងកសិកម្ម រុក្ខាប្រមាញ់ និងនេសាទ លើការងារដូចតទៅ៖

លើកសំណើគោលនយោបាយ យុទ្ធសាស្រ្ត ផែនការ កម្មវិធី គម្រោង និងវិធានការអភិវឌ្ឍផលិតកម្មដំណាំ ប្រកបដោយនិរន្តរភាព ផលិតភាព និងភាពប្រកួតប្រជែង
ពិសោធន៍ ស្រាវជ្រាវ អភិវឌ្ឍបច្ចេកវិទ្យា និងសិក្សាស្រាវជ្រាវសេដ្ឋកិច្ចសង្គមទាក់ទងនឹងកិច្ចអភិវឌ្ឍន៍ពិពិធភាវូបនីយកម្ម បង្កើនផលិតភាព និងកសិពាណិជ្ជបនីយកម្មផលិតកម្មដំណាំ ដើម្បីចូលរួមធានាសន្តិសុខស្បៀង លើកកម្ពស់ជីវភាពរស់នៅរបស់ប្រជាជន និងជំរុញបង្កើនការនាំចេញកសិផល
ជំរុញការរៀបចំនិងគាំទ្រការប្រពឹត្តទៅ ការប្រតិបត្តិនិងការអភិវឌ្ឍរបស់សហគមន៍កសិកម្ម អង្គការផលិតករកសិកម្ម និងសម្របសម្រួលរវាងប្រតិបត្តិករសារធារណៈ ឯកជន និងផលិតករកសិកម្មដើម្បីបង្កើនសមត្ថភាពស្ថាប័ន និងជំនាញបច្ចេកទេសកសិកម្ម ឱ្យក្លាយទៅជាសហគ្រាសសេដ្ឋកិច្ចកសិកម្មជនបទ និងបង្កើនអំណាចចចារទីផ្សារ
ជំរុញបង្កើនផលិតភាពកសិកម្ម និងប្រាក់ចំណូលពីផលិតកម្មកសិកម្ម ដោយប្រើប្រាស់ពូជដំណាំ ធនធានដី ប្រព័ន្ធស្រោចស្រព វិធីសាស្រ្តដាំដុះ វិធានការអនាម័យនិងភូតគាមអនាម័យ ការពារដំណាំ និងគ្រឿងយន្តកសិកម្មស្របតាមក្សេត្របរិស្ថាន និងលក្ខខណ្ឌភូមិសាស្រ្តសេដ្ឋកិច្ចសង្គម
ផ្តល់សេវាវិភាគស្រាវជ្រាវ វាយតម្លៃគុណភាព និងសុវត្ថិភាព ដី ជី ទឹក រុក្ខជាតិ ថ្នាំកសិកម្ម ស្ថានភាពសុខភាពដំណាំ ពូជគ្រប់ប្រភេទនៃដំណាំ កំណត់អត្តសញ្ញាណកម្មសមាសភាពចង្រៃ ភ្នាក់ងារជីវសាស្រ្តដែលប្រើប្រាស់ក្នុងផលិតកម្មដំណាំ និងកាកសំណល់សារធាតុគីមីនិងកាកសំណល់ជីវសាស្រ្តកសិកម្ម ដើម្បីគាំទ្រក្នុងផលិតកម្ម និងកសិពានិជ្ជូបនីយកម្មកសិកម្ម
រៀបចំសេចក្តីព្រាងច្បាប់និងលិខិតបទដ្ឋានគតិយុត្តក្រោមច្បាប់នានាដែលពាក់ព័ន្ធ ដើម្បីបម្រើឱ្យការអភិវឌ្ឍអនុវិស័យដំណាំនិងផ្នែកពាក់ព័ន្ធផ្សេងៗទៀតចំណុះអគ្គនាយកដ្ឋានកសិកម្ម
ជំរុញការរៀបចំហេដ្ឋារចនាសម្ព័ន្ធគ្រប់គ្រង ការអនុវត្តវិធានការការពារដំណាំ អនាម័យ និងភូតគាមអនាម័យ ប្រកបដោយប្រសិទ្ធភាពនិងភាររបរិស្ថាន ដើម្បីលើកកម្ពស់ផលិតភាព គុនភាព និងសុវត្ថិភាពស្បៀងមានដើមកំណើតពីរុក្ខជាតិ
តាមដាន ព្យាករណ៍សក្តានុពលហានិភ័យ និងចាត់វិធានការអន្តរាគមន៍សង្រោះ និងស្តារការខូចខាតដំណាំ ដែលបង្កដោយគ្រោះធម្មជាតិ និងការរាតត្បាតពីសំណាក់សមាសភាពចង្រៃផ្សេងៗ
ជំរុញកិច្ចសហការ និងអនុវត្តស្តង់ដារ គោលការណ៍ណែនាំ ពិធីសារ អនុស្សរណៈ កិច្ចព្រមព្រៀង និងបណ្តាលិខិតបទដ្ឋានកម្រិតជាតិ តំបន់ និងអន្តរជាតិ
តាមដាន វាយតម្លៃគុណភាពដី ការប្រើប្រាស់ដី កំណត់ប្រព័ន្ធក្សេត្របរិស្ថាន និងសេដ្ឋកិច្ចសង្គម ដើម្បីកំណត់តំបន់ដាំដុះកសិកម្មប្រកបដោយប្រសិទ្ធភាពសេដ្ឋកិច្ច។