ព័ត៌មានផ្សេងៗទៀត
ឯកឧត្តមរដ្ឋលេខាធិការ ប្រាក់ ដាវីដ ទទួលជួបសម្តែងការគួរសមជាមួយលោកបណ្ឌិត Richard Linton សាកលវិទ្យាធិការនៃសាកលវិទ្យាល័យរដ្ឋកាន់សាស់ (KSU) និងគណៈប្រតិភូអមដំណើរ
ចេញផ្សាយ ០៧ កុម្ភៈ ២០២៥ 1915
នៅព្រឹកថ្ងៃទី០៧ ខែកុម្ភៈ ឆ្នាំ២០២៥ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានទទួលជួបសម្តែងការគួរសមជាមួយលោកបណ្ឌិត Richard Linton សាកលវិទ្យាធិការនៃសាកលវិទ្យាល័យរដ្ឋកាន់សាស់ (KSU) និងគណៈប្រតិភូអមដំណើរ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។
នាឱកាសនៃជំនួបនេះ ឯកឧត្តមរដ្ឋលេខាធិការ បានសម្តែងនូវការស្វាគមន៍គណៈប្រតិភូមកពីសាកលវិទ្យាល័យរដ្ឋកាន់សាស់ ដើម្បីពង្រឹងកិច្ចសហប្រតិបត្តិការជាមួយគ្នា ក្នុងការបណ្តុះបណ្តាល និងកសាងសមត្ថភាពធនធានមនុស្សក្នុងវិស័យកសិកម្ម ជាពិសេសការផ្ទេរចំណេះដឹងសិក្សាស្រាវជ្រាវ និងការងារពិសោធន៍។
ពាក់ព័ន្ធនឹងការអភិវឌ្ឍន៍ធនធានមនុស្ស ឯកឧត្តមរដ្ឋលេខាធិការ បានលើកទឹកចិត្តសាកលវិទ្យាល័យ ក្នុងការចូលរួមផ្តល់ចំណេះដឹងកសិកម្ម និងចំណេះដឹងភាសាអង់គ្លេសដល់សិស្សនិស្សិតកម្ពុជា និងមន្រ្តីកសិកម្មឃុំ-សង្កាត់ ដែលជាទុនដ៏សំខាន់សម្រាប់ការងារទំនាក់ទំនងប្រចាំថ្ងៃ ការងារបច្ចេកទេសកសិកម្ម និងការសិក្សាស្រាវជ្រាវ ពិសោធន៍នានា ដែលទាមទារការយល់ដឹងជាភាសាអង់គ្លេសជាសំខាន់។
ទន្ទឹមនឹងនេះ ឯកឧត្តមរដ្ឋលេខាធិការ ក៏បានលើកឡើងពីកម្មវិធីអភិវឌ្ឍវិស័យកសិកម្ម ផ្សាភ្ជាប់ការវិនិយោគទៅនឹងពាណិជ្ជកម្ម (CAFE-2025) គឺជាកម្មវិធីមួយដ៏សំខាន់ក្នុងការកៀរគរ និងស្វែងយល់ពីតម្រូវការអ្នកវិនិយោគមកប្រទេសកម្ពុជា ជាពិសេសអាចជំរុញការនាំចេញកសិផលសក្តានុពលកម្ពុជារួមមានស្រូវអង្ករ ស្វាយ ស្វាយចន្ទី ដំឡូងមី និងកៅស៊ូជាដើម ដែលត្រូវការការចូលរួមគ្រប់ភាគីពាក់ព័ន្ធ ទទួលបានឱកាសនៃការវិនិយោគពេញលេញ តភ្ជាប់ខ្សែច្រវាក់ផលិតកម្ម និងតម្លៃ និងជំរុញការនាំចេញបានពិតប្រាកដ៕
