ព័ត៌មានផ្សេងៗទៀត
លោកជំទាវអនុរដ្ឋលេខាធិការ អ៊ឹម រចនា អញ្ជើញជាគណៈអធិបតី ក្នុងកម្មវិធីប្រគល់សម្ភារបរិស្ថាន និងរួមគ្នាសំអាតបរិស្ថាន នៅរមណីដ្ឋានអន្លង់ផ្សោតកាំពី នៃព្រឹត្តិការណ៍ «យុទ្ធនាការហែលទឹកទន្លេមេគង្គ ដើម្បីគាំទ្រសត្វផ្សោតកម្ពុជា»
ចេញផ្សាយ ២១ មីនា ២០២៥ 1555
នៅព្រឹកថ្ងៃទី២០ ខែមីនា ឆ្នាំ២០២៥ លោកជំទាវ អ៊ឹម រចនា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អញ្ជើញជាគណៈអធិបតី ក្នុងពិធីប្រកាសបើកកម្មវិធីប្រគល់សម្ភារបរិស្ថាន និងចូលរួមគ្នាសំអាតបរិស្ថាននៅរមណីដ្ឋានអន្លង់ផ្សោតកាំពី ក្នុងព្រឹត្តិការណ៍ «យុទ្ធនាការហែលទឹកទន្លេមេគង្គ ចម្ងាយ១២០គីឡូម៉ែត្រ ដើម្បីគាំទ្រសត្វផ្សោតកម្ពុជា»។
កម្មវិធីមានការចូលរួមពីឯកឧត្តម គង់ គឹមនី គណៈអភិបាលរងខេត្តក្រចេះ លោក ផៃ សុម៉ានី អនុប្រធាននាយកដ្ឋានអភិរក្សជលផល លោក ចាប វិបុល នាយកអង្គការ WWF-កម្ពុជា លោក ភួង ទីណា នាយរងអធិការដ្ឋានរដ្ឋបាលជលផលទន្លេមេគង្គ លោក ម៉ុក ពន្លក នាយខណ្ឌរដ្ឋបាលខេត្តក្រចេះ អាជ្ញាធរពាក់ព័ន្ធ គណៈកម្មការរមណីយដ្ឋានអន្លង់ផ្សោត លោកគ្រូអ្នកគ្រូ និងសិស្សានុសិស្សប្រមាណ១០០នាក់។
នៅចំពោះមុខអង្គពិធី លោកជំទាវ អ៊ឹម រចនា បានពាំនាំនូវការផ្តាំផ្ញើសួរសុខទុក្ខពីសំណាក់ឯកឧត្តម រដ្ឋមន្រ្តី ឌិត ទីណា ជូនចំពោះអង្គពិធីទាំងមូល។ បើតាមលោកជំទាវ ការសំអាតបរិស្ថាន មិនថានៅផ្ទះ ឬនៅតាមទីសាធារណៈ គឺជាការងាររបស់យើងគ្រប់គ្នា ដើម្បីអនាម័យ និងសុខុមាលភាពក្នុងការរស់នៅ។ ចំណែកការសម្អាតបរិស្ថាននៅតំបន់រមណីយដ្ឋានកាំពី និងរមណីយដ្ឋានដទៃទៀតឱ្យមានសោភ័ណភាពល្អ កាន់តែសំខាន់ថែមទៀត ដើម្បី៖ ទី១ ទាក់ទាញភ្ញៀវទេសចរដែលមកកម្សាន្ត និងធានាថាកុំឱ្យសំរាមនៅលើគោកធ្លាក់ទៅក្នុងទន្លេមេគង្គ ដែលបង្កការបំពុលបរិស្ថាន និងអាចប៉ះពាល់ដល់សត្វផ្សោត ដែលជារតនសម្បត្តិរបស់ជាតិ។
លោកជំទាវអនុរដ្ឋលេខាធិការគូសបញ្ជាក់បន្ថែមថា ការទុកដាក់សម្រាមឱ្យបានត្រឹមត្រូវ ដ្បិតតែបុគ្គលមួយចំនួនចាត់ថាជាការងារតូចតាច តែវាជះឥទ្ធិពលធំធេងណាស់ដល់បរិស្ថាន ទាំងនៅជុំវិញខ្លួនយើង ទាំងនៅក្នុងសហគមន៍ នៅក្នុងប្រទេសកម្ពុជា។ ការគ្រប់គ្រងនិងថែរក្សាបរិស្ថានតាមដងទន្លេ ជាពិសេសនៅតំបន់រមណីយដ្ឋានកាំពីបានល្អប្រសើរ ជាការធានាថា សត្វផ្សោតនិងធនធានជីវៈចម្រុះនៃទន្លេមេគង្គ នឹងបន្តនៅគង់វង្សស្ថិតស្ថេរសម្រាប់កូនចៅជំនាន់ក្រោយ និងជាចំណែកមួយជួយទាក់ទាញភ្ញៀវទេសចរមកកម្សាន្ត ដែលអាចលើកស្ទួយជីវភាពប្រជាពលរដ្ឋនៅតំបន់កាំពីនេះឱ្យកាន់តែរីកចម្រើនថែមទៀត ស្របទៅនឹងគោលនយោបាយរបស់ក្រសួងកសិកម្ម រុក្ខាប្រមាញ់ និងនេសាទ គឺ៖ «មានហូប មានប្រើ មានបាន និងមានរហូត»៕
